Xalq artisti koronavirusa görə maşınını və bağını satdı
- 19-09-2020, 12:01
- Mədəniyyət
Xalq artisti Brilliant Dadadşova pandemiyanın maddi durumuna etdiyi təsirdən danışıb. ''Azad Səs'' Qaynarinfo-ya istinadən xəbər verir ki, Kult.az-a müsahibə verən sənətçi xərclərini qarşılamaq üçün maşınını və bağını satmağa məcbur qaldığını deyib:
"Əvvəl iki maşınımızdan birini satdıq, çünki Cahadın imkansız tələbələr üçün hazırladığı və üzərində iki ildən çox çalışdığı layihə gəlir gətirməyəcəkdi. Bunu təmənnasız etmişik. Həm də fikrimizcə, bu layihə külli miqdarda vəsait tələb edirdi. Cahad bu layihəyə başlayanda hələ pandemiyanın olacağından xəbərsiz idim. Sonra isə o proyekti tamamlamaq lazım idi. Biz də əlimizdən gələni etdik.
Ailəmiz böyük olduğuna görə Buzovnadakı şəxsi bağımızı satdıq. Onun yaxınlığında Buzovnada böyüdüyümüz atamın bağı var. Ailə üzvləri ilə ora yığışırıq. Satdığımız şəxsi bağımız isə 24 sotun içində idi. Əvvəl istədik orada hər hansı bir təsərrüfat işi görək, sonra anladıq ki, bu da böyük məbləğdə vəsait tələb edir. Koronavirus pandemiyasının olacağını bilmirdik, yoxsa əvvəldən tədarüklü olardıq. Xərclərimizə qənaət edərdik”.
