Səfir: Azərbaycan “yaşıl” enerjiyə keçid sahəsində Meksika ilə təcrübə mübadiləsində maraqlıdır

Azərbaycan Meksika ilə “yaşıl” enerjiyə keçid sahəsində təcrübə mübadiləsində, eləcə də iqtisadi əməkdaşlığın inkişaf etdirilməsində maraqlıdır.

“Report” xəbər verir ki, bunu Azərbaycanın Meksikadakı səfiri Məmməd Talıbov “El Economista” nəşrinə müsahibəsində deyib.

Onun sözlərinə görə, Azərbaycan həm də Meksika ilə investisiya və ticarət sahəsində əməkdaşlığı gücləndirməyə çalışır.

“İki ölkə parlamentləri arasında açıq dialoq və əməkdaşlığa baxmayaraq, mövcud potensialı nəzərə alaraq, iqtisadi sahədə artım üçün hələ də imkanlar var. Səfirliyin əsas vəzifələrindən biri Azərbaycan və Meksika sahibkarları arasında qarşılıqlı əlaqə kanallarının yaradılmasıdır”, - səfir vurğulayıb.

M.Talıbov qeyd edib ki, həra hansı bir Meksika şirkəti Mərkəzi Asiya, Avropa, Türkiyə və ya Rusiya bazarlarına çıxmaq istəsə, bunu Azərbaycan vasitəsilə, ölkədən qovşaq kimi istifadə edərək həyata keçirə bilər. Bundan əlavə, kənd təsərrüfatı, texnologiya və ya çip istehsalı sahələrində mübadilə yaradıla bilər.

Diplomat xatırladıb ki, Azərbaycan bərpa olunan enerji mənbələri sahəsində regional liderdir və “yaşıl” enerjiyə keçid sahəsində təcrübəsini Meksika ilə bölüşə bilər.

“Avropa İttifaqının bir neçə ölkəsi ilə anlaşma memorandumları imzalamışıq və “yaşıl” enerjinin Avropaya ixracı layihəsini həyata keçiririk. Azərbaycanın “yaşıl” enerji - külək və günəş enerjisi üzrə böyük potensialı var”, - səfir vurğulayıb.

M.Talıbovun sözlərinə görə, Azərbaycan və Meksika arasında turist axını artıb, lakin turizm əlaqələrinin inkişafı potensialını nəzərə alaraq lazımi səviyyəyə çatmayıb. O əlavə edib ki, meksikalılar asanlıqla elektron viza əldə edə və Azərbaycanın müxtəlif turizm infrastrukturu ilə tanış ola bilərlər.

Sonda səfir vurğulayıb ki, nəqliyyat və enerji marşrutlarının kəsişməsində strateji mövqe tutan Azərbaycan Cənubi Qafqaz kimi perspektivli regionda Meksika üçün əsas tərəfdaş ola bilər.