İƏT rəsmisi: COP29-un nəticələrinin icrası üçün əməkdaşlığın genişləndirilməsi vacibdir
- 11-03-2025, 11:19
- Dünya
Bunu İslam Əməkdaşlıq Təşkilatının (İƏT) BMT-də daimi müşahidəçisi səfir Hamid Ajibaiye “Report”un ABŞ bürosuna açıqlamasında bildirib.
“Mən Qəbələ şəhərində olmuşam və Azərbaycanın zəngin təbiətə malik olduğunu görmüşəm. Bu gün Azərbaycan yaşıl iqtisadiyyata keçid üçün dünyaya nümunə ola biləcək ölkələr sırasındadır”, – o deyib.
Diplomat BMT-nin Nyu-Yorkdakı mənzil-qərargahında Qadınların Statusu Komissiyasının (CSW69) 69-cu sessiyası çərçivəsində Azərbaycanın ev sahibliyi ilə təşkil olunmuş “Bakı İqlim Koalisiyası – KOB-ların Yaşıl Keçidi: Qadınların Gücləndirilməsi” mövzusunda müzakirələrin önəmindən danışıb.
O qeyd edib ki, tədbirin baş məqsədi COP29-un nəticələrini dəyərləndirmək və Bakı prosesinin necə həyata keçiriləcəyini müzakirə etməkdir. Səfirin sözlərinə görə, Azərbaycanın COP29 çərçivəsində əsas hədəfi yaşıl texnologiyalara maliyyə vəsaitinin artırılması və istixana qazı emissiyalarının azaldılmasına töhfə verməkdir.
“Bu görüşdə qlobal və regional əməkdaşlıq məsələləri müzakirə olunur. Tədbir çərçivəsində İƏT-in fəaliyyətinə dair təqdimat da edilib. Əvvəlki COP tədbirlərindən COP28 və COP29 İƏT ölkələrində keçirilib. Azərbaycan da İƏT-in üzvüdür və əsas məqsəd əməkdaşlığı genişləndirmək, bu təşəbbüslərin gerçəkləşməsini təmin etməkdir. Xüsusilə kiçik və orta biznesin, eləcə də qadınların bu maliyyə imkanlarından faydalanmasını təmin etmək vacibdir”, – Hamid Ajibaiye vurğulayıb.
Bundan başqa, səfir bildirib ki, yaşıl iqtisadiyyata keçid üçün maliyyə resurslarının üçqat artırılması təklif edildiyindən bu vəsaitlərin səfərbər edilməsi yolları da tədbirdə əsas müzakirə mövzularından biri olub.
