Alimlər ölümcül Ebola qızdırmasının müalicəsində irəliləyiş əldə ediblər
"Report" xəbər verir ki, bununla bağlı araşdırma "Science Advances" (SciAdv) elmi jurnalında dərc olunub.
Ebola qızdırması ilk dəfə 1976-cı ildə aşkar edilmiş ölümcül virus xəstəliyidir. Bədən mayeləri ilə birbaşa təmas zamanı ötürülür və ağır qanaxmaya, orqan çatışmazlığına və yüksək ölümə səbəb olur. Peyvəndin və venadaxili müalicələrin mövcudluğuna baxmayaraq, onların istifadəsi yüksək qiymətə, soyuducuda saxlanma ehtiyacına və yoxsul bölgələrdə tətbiq olunma çətinliyinə görə məhduddur.
“Obeldesivir”, əvvəlcə COVID-19-un müalicəsi üçün hazırlanmış “Remdesivir” dərmanının oral formasıdır. O, virusun çoxalması üçün lazım olan fermenti bloklayır və geniş fəaliyyət spektrinə malikdir, bu da onu Ebolanın müxtəlif ştamlarına qarşı effektiv edir.
Komanda insanlarla yaxın qohum olan rezus və makaka meymunları üzərində sınaqlar aparıb. “Obeldesivir” həbləri birinci növ meymunlarda 100 %, ikinci növ primatlarda isə 80 % sağ qalmağı təmin edib.
Mütəxəssislər qeyd ediblər ki, dərman təkcə qanı virusdan təmizləmir, həm də orqan zədələnməsinin qarşısını alaraq immun reaksiyanın inkişafına kömək edir.
