Çin ekstremal şərtlər üçün ilk keramik aerogelini yaradıb

Çinin Elmlər Akademiyasının Hefey Fizika Elmləri İnstitutunun alimləri yüksək anizotrop istilik keçiriciliyinə və müstəsna istilik sabitliyinə malik olan yeni növ keramika aerogeli SiC@SiO2-i hazırlayıblar. Aerogel aerokosmik sənayedə, energetikada və etibarlı istilik izolyasiyasının tələb olunduğu digər sahələrdə tətbiq oluna bilər.

"Report"un xəbərinə görə, tədqiqatın nəticələri "Advanced Science" (AdvSci) elmi jurnalında dərc olunub.

Keramik aerogel ağacın damar sistemi və ya ipəkqurdu baramalarının laylı arxitekturası kimi təbii strukturlardan ilhamlanır. Bu təbii strukturlar daxili təşkili vasitəsilə istiliyi səmərəli şəkildə idarə edir.

Aerogeli hazırlamaq üçün tədqiqatçılar elektrospinninq və dondurularaq qurutma üsullarının birləşməsindən istifadə ediblər.

Əvvəlcə yüksək kimyəvi dayanıqlığa malik olan termal stabil silisium karbid (SiC) nanolifləri sintez edilib. Sonra onların səthinə amorf silikon dioksid (SiO₂) qabığı tətbiq edilib. Bu örtük fonon maneə rolunu oynayaraq həm təbəqədaxili uyğunlaşmanı, həm də təbəqələrarası yığmanı təmin edərək materiala yüksək dərəcədə oriyentasiya və nizam verir.

Mütəxəssislərin fikrincə, aerogel geniş temperatur diapazonunda - 196°C-dən 1 300°C-dək öz xüsusiyyətlərini saxlayır, bu da onu kosmik şərait və digər ekstremal mühitlər üçün ideal edir.