Makron: Fransa Olimpiya Oyunlarının açılışında əsl simasını göstərib
“Report” xəbər verir ki, müvafiq açıqlamanı Yelisey sarayının mətbuat xidməti yayıb.
Makron əlavə edib ki, Olimpiya Oyunlarının açılış mərasiminin bədii rəhbərinə, eləcə də onun səhnələşdirdiyi tamaşanın artistlərinə qarşı təhdidlər barədə xəbərlər onu “qəzəbləndirib və kədərləndirib”.
“Hamısına dəstəyimi bildirirəm. Sənətkarlara qarşı təhdidlərə heç nə haqq qazandırmır. Onun (Jolli - Qeyd) cəsarəti bir çox insana fayda gətirdi. Fransızlar Olimpiya Oyunlarının açılış mərasimi ilə fəxr edirlər, biz bununla fəxr edirik. Hesab edirəm k, Fransa özünün əsl üzünü göstərdi. O, cəsarətini nümayiş etdirərək bunu özünəməxsus bədii sərbəstliyi ilə ifadə edib”.
Bundan əvvəl Paris prokurorluğu Jolliyə qarşı təhdidlərə görə təhqiqat başlatmışdı. “RMC” radiosunun məlumatına görə, o, cinsi oriyentasiyası ilə bağlı sosial şəbəkələrdə alınan təhdidlərdən şikayət edib.
İyulun 26-da Parisdə keçirilən Oyunların açılış mərasimində Leonardo da Vinçinin “Sonuncu şam yeməyi” əsərinin təxribat xarakterli parodiyası nümayiş etdirilib. Tamaşanın müəyyən fraqmentləri sosial şəbəkələrdə geniş yayılıb və kəskin tənqid atəşinə tutulub.
Xüsusən də Macarıstanın Baş naziri Viktor Orban bildirib ki, Parisdə Olimpiya Oyunlarının açılış mərasimi Qərbin mədəniyyət və ictimai əxlaqla bağlı təsəvvürlərinin azlığını göstərib. ABŞ-nin texnologiya şirkəti “C Spire” bu qalmaqallı parodiyadan sonra Paris olimpiadasından öz reklamını geri götürmək qərarına gəlib. Bəzi katoliklər açılış mərasiminin bu hissəsini təhqiramiz hesab ediblər. Fransa Katolik Kilsəsi də “xristianlığın istehza və istehza səhnələrini ehtiva edən” mərasimi pisləyib.
Türkiyə Prezidenti Rəcəb Tayyib Ərdoğan Parisdəki Yay Olimpiya Oyunlarının açılış mərasimində LGBT-nin təbliğ edilməsini pisləyib və bu məsələni Roma Papası Fransisk ilə müzakirə etmək niyyətində olduğunu bildirib.
Bundan başqa açılış mərasimini italiyalı siyasətçilər və parlamentarilər, milyarder İlon Mask və bir çox beynəlxalq media orqanları tənqid ediblər.
