Aİ: "Rusiya ucuz qiymətə taxıl satmaqla kasıb ölkələri özündən asılı vəziyyətə salmaq istəyir"
“Report” xarici KİV-ə istinadən xəbər verir ki, bunu Aİ-nin xarici işlər və təhlükəsizlik siyasəti üzrə ali nümayəndəsi Josep Borrel inkişaf etməkdə olan ölkələrə və G7 ölkələrinə göndərdiyi məktubda bildirib.
O, həmin ölkələri “Taxıl sazişi” ilə bağlı konkret mövqe ortaya qoymağa çağırıb. J.Borrelin sözlərinə görə, Rusiya aşağı qiymətlərlə taxıl tədarükü ilə bağlı ikitərəfli təkliflərlə həssas ölkələrə üz tutur, guya özünün yaratdığı problemi həll edir.
O qeyd edib ki, Aİ mövcud sanksiyaların üçüncü ölkələrin ərzaq təhlükəsizliyinə təsir göstərməməsi üçün əlindən gələni edir.
Xatırladaq ki, BMT Təhlükəsizlik Şurasının Ukrayna ilə bağlı keçirilən iclasında əksər ölkələr Rusiyanı "Taxıl sazişi"inin müddətini uzatmağa çağırıb. Sənədin müddəti iyulun 17-də başa çatıb və Moskva hələlik iştirakını yeniləmək niyyətində olmadığını açıqlayıb.
Türkiyə Prezidenti Rəcəb Tayyib Ərdoğan “Taxıl sazişi”nin uzadılması ilə bağlı Rusiya Prezidenti Vladimir Putinlə danışmaq niyyətində olduğunu bəyan edib. Ankara sazişin ən qısa zamanda bərpasını gözləyir.
Rəsmi Moskvanın bu ay dördtərəfli (Ukrayna, Türkiyə, BMT və Rusiya) “Taxıl sazişi”ndən çıxması Odessa ətrafında hərbi vəziyyəti gərginləşdirməklə yanaşı, qlobal humanitar böhran təhlükəsi yaradıb.
