Premyer Liqa: "Sabah" "Turan Tovuz"un, "Neftçi" "Səbail"in qonağı olacaq
"Report"un məlumatına görə, matçlardan biri bölgədə, digəri isə paytaxtda baş tutacaq.
Günün ilk qarşılaşmasında "Turan Tovuz" "Sabah"ı qəbul edəcək. Hazırda meydan sahibləri 29 xalla 6-cı, qonaqlar isə 68 xalla 2-ci pillədə qərarlaşıblar.
İki komanda indiyədək ölkə çempionatında cəmi 3 dəfə qarşılaşıb. Bunların birində Qərb təmsilçisi, ikisində isə Bakı klubu qələbə qazanıb. Topların nisbətində isə "bayquşlar" öndədir - 4:3.
"Sabah" səfərdə quru hesabla qalib gəlib. Qonaq olan komanda hər üç matçda qol vurub.
Günün son oyununda isə "Neftçi" "ASCO Arena"da "Səbail"in qonağı olacaq. "Ağ-qaralar" 60 xalla 3-cü pillənin sahibidirlər. 21 xalı olan "dənizçilər" isə sonuncu sırada yer alıblar.
Komandalar arasında bunadək baş tutan 22 matçın ikisində meydan sahibləri, 17-də qonaqlar qələbəni bayram ediblər. 3 qarşılaşmada qalib müəyyənləşməyib. Laurentsiu Regekampfın baş məşqçi olduğu kollektiv bu görüşlərdə 49, Şahin Diniyevin rəhbərlik etdiyi komanda isə 12 qol vurub.
"Neftçi" son 11 oyunda qalib gəlib. "Səbail" ardıcıl 15 qarşılaşmada qələbə qazana bilməyib.
Azərbaycan Premyer Liqası
XXXI tur
22 aprel (şənbə)
16:00. "Turan Tovuz" - "Sabah"
Hakimlər: Cavid Cəlilov, Kamran Bayramov, Zöhrab Abbasov, Rövşən Rəcəbov
Hakim-inspektor: Asim Xudiyev
AFFA nümayəndəsi: Əsgər Əmirəliyev
Tovuz şəhər stadionu.
18:30. "Səbail" - "Neftçi"
Hakimlər: Rəvan Həmzəzadə, Cəmil Quliyev, Teymur Teymurov, Emin Əliyev
Hakim-inspektor: Vüsal Əliyev
AFFA nümayəndəsi: Ramiz Mustafayev
"ASCO Arena".
Qeyd edək ki, XXXI turun əvvəlki oyunlarında "Şamaxı" evdə "Kəpəz"lə 1:1, "Qarabağ" isə "Zirə" ilə 2:2 hesablı heç-heçə edib. Tura aprelin 23-də keçiriləcək "Sumqayıt" - "Qəbələ" görüşü ilə yekun vurulacaq.
