Daniel Noboanı Ekvadordakı prezident seçkilərinin qalibi elan edilib
- 14-04-2025, 14:55
- Dünya
“Report” xəbər verir ki, bunu MSŞ-nin sədri Diana Atamaint mətbuat konfransında bildirib.
“Ekvador xalqına bildiririk ki, protokolların 90 %-nin emalı nəticəsində prezident seçkilərinin ikinci turunda dönməz tendensiya müşahidə olunur. MSŞ “Milli Demokratik Hərəkat” partiyasından olan namizədləri (prezident və vitse-prezident – red.) Daniel Noboa və Maria Xose Pintonu qalib hesab edir”, – seçki qurumunun sədri söyləyib.
Atamaintin fikrincə, səslərin hesablanmasının nəticələri “xalqın iradəsinin dəqiq əksidir”.
Daha əvvəl Noboanın seçkilərdəki rəqibi Luisa Qonsales məğlubiyyətini tanımaqdan imtina edib və səslərin yenidən sayılmasına çağırıb.
MSŞ-nin protokolların 92,64 %-nin emalından sonra dərc edilmiş məlumatlarına görə, Noboa seçicilərin 55,88 %-nin, Qonsales isə 44,12 %-nin səsini qazanıb. Namizədlər arasındakı fərq 1,1 milyon səsdən çoxdur.
