İsrail Ordusu: Livandakı hədəflərə zərbələr davam etdiriləcək

İsrail hərbçiləri Livandakı radikal “Hizbullah” təşkilatının bir sıra yeni hədəflərinə hücum edib və "zərurət yarandıqda" zərbələri davam etdirmək niyyətindədir.

“Report” xəbər verir ki, bu barədə Ordunun Mətbuat xidməti məlumat yayıb.

“İsrail Ordusu bir müddət əvvəl Livan boyu “Hizbullah”ın komandanlıq mərkəzlərinə, infrastruktur obyektlərinə, terrorçulara, reaktiv yaylım atəşi qurğusuna və silah anbarına zərbələr endirib”, - bəyanatda deyilir.

“İsrail Ordusu ölkənin mülki sakinlərini qorumaq üçün lazım gəldikdə zərbələr endirməyə davam edəcək”, - Ordudan əlavə olunub.

Ordunun mətbuat xidməti Livana ikinci silsilə kütləvi zərbələrin başladığını elan edib. Birinci dalğa zamanı onlarla hədəfə hücum edilib: “Hizbullah”ın reaktiv yaylım atəşi sistemləri və respublikanın cənubunda təşkilatın silahlı birləşmələrinin hərəkətlərini əlaqələndirən qərargaha.

İsrailin məlumatına görə, zərbələr Livan tərəfindən atəşə tutulmağa cavab olaraq endirilir.

Səhər saatlarında İsrail Ordusu sərhəddəki Metula şəhərinə doğru atılan bir neçə mərmini aşkarladığını, onlardan üçünün zərərsizləşdirildiyini bildirib.