Tramp: Vaşinqton Moskva və Pekin yaxınlaşmasını istəmir

Birləşmiş Ştatlar Rusiya və Çinin daha da yaxınlaşmasını istəmir, lakin hər iki ölkə ilə münasibətlərin yaxşılaşacağına ümid edir.

“Report” xəbər verir ki, bu barədə ABŞ prezidenti Donald Tramp “Fox News” telekanalına müsahibəsində bildirib

O, “Rusiya və Çinin yaxınlaşmasını istəmədiyini” vurğulayıb. “Biz hər iki ölkə ilə münasibətləri yaxşılaşdırmağa çalışırıq”, – Amerika lideri qeyd edib.

“Düşünürəm ki, ÇXR sədri Si Cinpin münasibətləri yaxşılaşdırmaq istəyərdi və düşünürəm ki, Rusiya da Birləşmiş Ştatlarla münasibətləri yaxşılaşdırmaq istəyir. Həmçinin fikrimcə, biz cəmi bir neçə ay əvvəl olduğumuz ölkədən tamamilə fərqli bir ölkəyə çevrildik. İndi biz hörmət edilən bir ölkəyik. Bizə hörmət etmirdilər. Bizə gülürdülər. Bizim səriştəsiz rəhbərliyimiz var idi”, – dövlət başçısı ABŞ-nin 46-cı prezidenti Cozef Baydendən danışarkən əlavə edib.

Tramp həmçinin vurğulayıb ki, Vaşinqton Moskva ilə geniş miqyaslı ikitərəfli ticarətin qurulmasında, o cümlədən ondan nadir torpaq elementlərinin alınmasında maraqlıdır.