Azərbaycan gələn il Türk Dövlətləri Təşkilatına sədrlik edəcək
Bunu “Report”a müsahibəsində TDT Baş katibinin müavini Ömer Kocaman deyib.
O vurğulayıb ki, TDT Birinci Türkoloji Qurultayın 100-cü ildönümündə Bakıda böyük bir konqres keçirmək və bu konqresdə ortaq türk əlifbasını bütün dünyaya təkrar elan etmək planlaşdırılır:
“Ortaq dil və əlifba həmişə müzakirə mövzusu olub. Bu istiqamətdə müxtəlif işlər də həyata keçirilib. Hazırda bununla bağlı çox mühüm irəliləyiş var. Türk dövlətləri tarixində ilk dəfə 34 hərfdən ibarət əlifba qəbul olunub. 1926-cı ildə Bakıda bir qurultay olmuşdu (Birinci Türkoloji Qurultay - red.) və bu tədbirdə ortaq əlifba qəbul edilmişdi. İndi 2026-cı ilə doğru gedirik, yəni qurultayın 100-cü ilinə. Hesab edirəm ki, 100-cü ildə ortaq əlifba məsələsini birdəfəlik həll etməliyik. 100-cü ildə TDT-yə sədrlik Azərbaycana keçəcək və biz 2026-cı ildə 100 il əvvəl olduğu kimi Bakıda böyük bir konqres keçirəcəyik. Orada ortaq əlifbanı dünyaya təkrar elan etmək istəyirik”.
Müsahibənin tam mətnini buradan oxuya bilərsiniz.
