KİV: “TikTok”u idarə edəcək yeni şirkət yarana bilər
“Report” xəbər verir ki, bu barədə “CNBC” televiziya şirkəti məlumat yayıb.
“Perplexity AI” artıq həm “TikTok”un çinli sahibi “ByteDance” şirkətinə, həm də potensial investorlara yeni şərtlər göndərib.
Təklif “NewCo” adlı yeni holdinqin yaradılması ilə yanaşı, ABŞ hökumətinə platformanın 50%-nə sahib olmağa imkan verəcək.
“Perplexity AI” ilk dəfə yanvarın 19-da “TikTok”u əldə etmək istəyini açıqlayıb. İlkin təklif “TikTok” səhmdarlarına paylarını saxlamağa və Kaliforniyada yerləşən “Perplexity AI”yə xidmətin videolarına giriş imkanı verəcəkdi. İndi isə “TikTok” səhmdarlarının yeni holdinqin səhmlərini ala biləcəyi gözlənilir.
ABŞ prezidenti Donald Tramp “TikTok”un ölkədəki taleyi ilə bağlı yaxın 30 gün ərzində qərar vermək niyyətində olduğunu bildirib. Amerika lideri həmçinin “TikTok”un alınmasını çox nüfuzlu insanlarla müzakirə etdiyini bildirib. Onun sözlərinə görə, bu sosial şəbəkənin amerikalı istifadəçilər üçün qorunub saxlanması iqtisadi baxımdan ABŞ üçün faydalı olacaq.
