Fransada cinayətkarlığın səviyyəsi kəskin artıb, məhbusların saxlanılması üçün yerlər çatışmır
“Report” xəbər verir ki, bu barədə Fransanın ədliyyə naziri Jerald Darmanin “Le Parisien” qəzetində dərc olunan müsahibəsində bildirib.
“Fransada 60 000 çarpayıya 82 000 məhbus düşüb ki, bu da 30 faizdən artıq sıxlıq deməkdir. Heç nə etməsək, bir neçə aydan sonra cinayətkarları həbs edə bilməyəcəyik”, - deyə nazir bildirib.
Bu problemi həll etmək üçün Darmanen qısa müddətə daha yüngül şərtlərlə məhkum edilmiş cinayətkarlar üçün həbsxanalar tikməyi təklif edib:
“Adi həbsxana tikmək üçün yeddi il lazımdır. Bura gözətçi qüllələri, tikanlı məftillər, xəndəklər daxildir. Amma hamını belə şəraitdə saxlamaq olmaz. Yeni müəssisələri qurmaq daha asan olacaq”.
O, narkotik vasitələrin qanunsuz dövriyyəsi ilə mübarizə mövzusuna, xüsusən də cinayətkar qrupları birbaşa həbsxanadan idarə etməyə davam edən liderlərə nəzarətin gücləndirilməsinə toxunub:
“Bu gün cəzaçəkmə müəssisələrindəki 17 min məhbus qadağan olunmuş maddələrin paylanmasına görə həbs edilib. Fransızlar başa düşmürlər ki, niyə bəziləri həbsxana kameralarından narkotik alverini istiqamətləndirməyə, pul göndərməyə və hətta qətllər sifariş etməyə davam edir. Fransa həbsxanalarını mobil telefonlardan təmizləmək, kriminal icmaların bütün liderlərini müəyyənləşdirmək və təcrid etmək niyyətindəyəm”.
Bundan əvvəl Ədliyyə Nazirliyi Fransa həbsxanalarında məhbusların sayının rekord həddə - 80 130 nəfər olduğu barədə hesabatını dərc edib.
