Aİ XİN başçıları Gürcüstanın Avropa inteqrasiyası prosesinin dayandırılması məsələsini müzakirə edəcəklər
“Report” xəbər verir ki, bu barədə Veymar üçbucağı ölkələrinin (Almaniya, Fransa, Polşa) XİN başçılarının birgə bəyanatında deyilir.
“Biz, Veymar üçbucağı ölkələrinin xarici işlər nazirləri, hakim “Gürcü Arzusu” partiyasının Aİ-yə üzvlük məsələsinin müzakirəsini ertələmək və 2028-ci ilədək Aİ-nin maliyyə dəstəyindən imtina etmək qərarından təəssüflənirik”, – bəyanatda qeyd olunub.
Sənəddə bildirilib ki, “Gürcü Arzusu”nun 2024-cü ilin əvvəlindən bəri atdığı addımlar “ölkənin Avropa İttifaqına üzvlük prosesinin faktiki olaraq dayandırılmasına” gətirib çıxarıb və Gürcüstan iqtidarının qəbul etdiyi tədbirlər ölkəni xarici və daxili qeyri-sabitliyə məruz qoyur.
“Biz bu məsələni Avropa İttifaqı səviyyəsində müvafiq tədbirlərin görülməsi üçün növbəti Xarici İşlər Şurasının müzakirəsinə çıxaracağıq və bundan əlavə, “Gürcü Arzusu”nun hərəkətlərinin ölkələrimizlə ikitərəfli münasibətlərə təsirini araşdıracağıq”, – bəyanatda vurğulanıb.
Nazirlər gürcü xalqının demokratik və Avropa istəklərini dəstəkləyəcəklərini təmin ediblər.
