İş adamının oğlu klinikanın mühafizəçisini qadına görə öldürüb

İş adamı Məmmədrəhim Rəhimliyə məxsus “Aristokrat” klinikasında onun oğlu Həsən Rəhimli tərəfindən törədilən cinayətlə bağlı detallar məlum olub.

“Azadsəs.az”ın məlumatına görə, klinika sahibinin oğlu tibb mərkəzinin gözətçisi Muraz Nəbiyevi gecə iş yerinə qadın gətirdiyi üçün döyərək öldürüb.
İki ilə yaxındır davam edən məhkəmə çəkişməsi bir müddət öncə yekunlaşıb və Ali Məhkəmə qətllə bağlı yekun qərar çıxarıb.

Hadisə 2020-ci il yanvarın 1-də baş verib. “Aristokrat” tibb mərkəzində müdir müavini işləyən H.Rəhimli gözətçinin yerində olmasını yoxlamaq məqsədilə tibb mərkəzinə gələrək qapını döyüb. İçəridən cavab gəlmədiyini görərək mərkəzin telefonuna zəng edib. Heç kim cavab vermədiyindən pəncərəni sındıraraq içəri daxil olub. Bundan sonra gözətçilərin istirahət otağına baxıb. Lakin orada da heç kim olmayıb. Daha sonra stomatoloq otağında klinikanın mühafizəçisini yox, başqa bir şəxslə qadın görüb.

Məlum olub ki, klinikanın mühafizəçisi bayram olduğu üçün yerinə tanışı Muraz Nəbiyevi qoyaraq 1 günlük onu əvəz etməsini istəyib. M.Nəbiyev isə gecə klinikada heç kimin olmamasından istifadə edərək qadın tanışını klinikaya dəvət edib.

Həsən Rəhimli məhkəmədə bildirib ki, içəri girən zaman qadın və gözətçi yarıçılpaq vəziyyətdə olublar. Rəhimli onların cinsi əlaqədə olmalarından şübhələnib. Bu səbəbdən Muraz Nəbiyevə mərkəzdə əxlaqsızlıq etməsinə dair iradlarını bildirib. Aralarında yaranmış mübahisə zamanı müdir müavini gözətçini döyüb. Muraz Nəbiyev aldığı xəsarətlərdən xəstəxanada vəfat edib.

H.Rəhimli gözətçinin infarktdan ölməsi barədə “102”yə məlumat verib. Hüquq-mühafizə orqanları onun infarktdan deyil, H.Rəhimli tərəfindən döyülməsi və aldığı xəsarətlərdən ölməsini müəyyən edib.

Bakı Ağır Cinayətlər Məhkəməsinin hökmü ilə Həsən Rəhimli 10 il müddətə azadlıqdan məhrum edilib. Daha sonra isə Bakı Apellyasiya Məhkəməsi tərəfindən cəza 9 ilə endirilib.

Təqsirləndirilən şəxsin vəkili Apellyasiya Məhkəməsinin hökmündən narazı qaldığı üçün kassasiya şikayəti verib. Lakin bir müddət sonra təqsirləndirilən şəxsin özü şikayətini geri götürüb. Ali Məhkəmə ərizəyə baxaraq şikayətin geri götürülməsinə etiraz etməyib və H.Rəhimlinin cəza müddəti 9 il olaraq saxlanılıb.